尾場兩監場董事大戰 04/10/2023 相信大家都知每個賽馬日都會有競賽董事小組監場賽事，而呢個小組嘅成員除咗5位受薪董事，亦有兩位馬會會員做監場董事，而萬一當日有佢哋名下馬匹出賽，就要喺嗰場賽事避席，由其他人頂替。而喺今晚跑馬地賽事，兩位監場董事就係馬會董事之一嘅楊紹信博士同埋陳錦榮先生，尾場楊博士有份嘅「龍來了」，同埋陳生有份嘅查理天使團體名下馬「銀亮光速」同場出擊，即係話呢場兩位監場董事都要避席，情況罕見，如果由佢哋構成一條監場董事Q，肯定係一時佳話。 楊紹信 事實上，「龍來了」同「銀亮光速」嘅牌面都唔太差，前駒今年3月初贏咗場谷草1650米後，升上三班表現較為徘徊，但上月中季內初出卻於此程後上得第4名，證明喺三班並非無競爭力，今次更得1檔之助，埋門工夫積極，有權提升名次。 陳錦榮 至於今季呂健威嗰啲爭跨季連捷馬有幾犀利，相信唔使點講，啱啱又有「勝不驕」跨季3捷兼捧盃，而「銀亮光速」上季尾喺1400米開齋，今次雖然轉爭谷草一哩，但在港同父馬「寶賢得得」贏谷草中距離，相信增程問題不大，值得重視。