上次馬主錯過拉頭馬　滿冠熊趁弗博冧莊 08/10/2023 今日第2場四班1650米泥地，季內喺同程包辦三重彩嘅「滿冠熊」、「妙算歡騰」同埋「紅粉豐彩」又同場較量，上仗贏馬嘅「滿冠熊」，今日有馬主范邦初入場加持，話唔定可以再下一城。 馬主范邦初 眾所周知，「熊」系馬主范邦初一直都係霍利時嘅忠實支持者，甚至練者在港最後一場頭馬「戰熊三千」，都係范生名下，之後佢就將旗下愛駒擺去賀賢馬房，而「滿冠熊」前季加盟賀廐都兩度入圍，點知上季初毫無表現，然後試過轉去高伯新馬房跑咗場第9名，其後轉交畀鄭俊偉訓練，都係冇乜起色。 艾兆禮、鄭俊偉、梁明偉 不過，到咗今季「滿冠熊」評50分起步，上月尾復出跑強項泥地1650米，結果喺艾兆禮胯下後上建功，兼幫米高開齋，可惜當日范生仲未返香港，未能入場拉頭馬，但都有打電話多謝米高，原來米高係第一個幫佢贏馬嘅華人練馬師。既然8歲馬難得回勇，米高安排「滿冠熊」再跑泥地一哩，據知今次范生會入場幫愛駒打氣，力爭連捷。 「好運寶馬」埋門由田泰安試泥閘得第3名。