最強浪漫組合 麥道朗展現風采 26/11/2023 早前「浪漫勇士」為港爭光，遠征澳洲覺士盾凱旋而歸，成為首匹揚威呢場一級賽嘅香港佳駟，練馬師沈集成固然居功至偉，但亦唔可以忽略鞍上人麥道朗，事關正正係呢位好手建議馬主劉栢輝同埋成哥不如畀呢匹應屆最佳中距離馬南下澳洲，兼且幫手跑埋熱身賽東寶錦標，即使只得殿軍，但喺正本戲及時回勇，喺騎者力策下殺低希斯3位囝囝訓練嘅「樂觀派」。 麥道朗 除咗騎練，另一位幕後功臣，梗係陪埋「浪漫勇士」去澳洲做伴跳馬嘅半同主馬「浪漫風采」，而「浪漫風采」亦有喺澳洲上陣，跑咗場1700米賽事，可惜只得第4名，估唔到相隔1個月，「浪漫風采」就可以喺香港復出上陣，角逐今日第9場三班1600米草地，咁啱麥道朗今日正式來港客串，自然交畀佢執韁，希望幫馬兒攞到在港首W。 浪漫風采今日再配麥道朗令人期待。 事實上，「浪漫風采」上季尾適應水土，喺三班1400米後上入Q，今季喺澳洲復出都跑得咁近，依家再喺香港復出由麥道朗掛帥，相信劉生即使搏失咗初出馬「浪漫梟雄」，今日可望靠「浪漫風采」補中拉頭馬。 馬主劉栢輝及沈集成