希威森力爭在港100W 07/01/2024 南非籍好手希威森喺2019年毅然來港發展，雖然當時成績平平，花咗半年時間只得3W，結果跑咗半季就離開，但佢並無放棄並於2021年11月重返香港，即使曾經歷一次嚴重墮馬意外，被迫養傷一段時間，但最終嗰季都有27W，然後上季更上一層樓，攞到50場頭馬排第5位，總算站穩陣腳。到咗今季，即使森仔仲未同佢嘅貴人兼伯樂韋達攜手贏馬，但佢亦得到唔少倉主支持，計埋剛周四憑「快如龍」增添進帳，佢喺香港已累積98場頭馬，只欠兩場就達100大關。 希威森 嚟到今日沙田賽事，潘頓繼續缺陣，希威森自然要好好把握機會，況且其坐騎實力唔差，既有新勝馬「爵登」，再加埋尾場「九五赤兔」，有機會贏夠100W。 九五赤兔（左）埋門試泥閘快放獲第３名。 先講吓「爵登」，其實前仗由潘頓縮程跑1000米直路賽已有勝望，可惜關鍵階段受阻騎唔到，剛戰由希威森接手跑同程立即補中開齋，今次原班人馬再攻同程，面對唔少蹄下敗將，有機會再下一城。至於尾場「九五赤兔」對上3仗都跑1400米，今次卻扳上一哩，但此駒上季尾於此程只係輸畀「安遇」、「綫路之星 」同「自勝者強」，絕對係好賽績，所以今次增程出擊唔係無道理，如果森仔可以靠韋達嘅「九五赤兔」攞到在港第100W，就更加有意義。