飛雲機會嚟喇！ 13/01/2024 「前天氣女郎」黃婉曼（Icy）當年決定唔做電視台後，試咗做唔同嘅主持工作，當中包括賽馬節目，自此就同賽馬結下不解緣，而咁啱佢老公馮柏基都係馬主，亦令Icy都進身養馬行列，當中佢有份嘅跳出香港團體嘅「跳出香港」服役期間攞到6場頭馬，分別贏過G3精英碟同埋二級賽沙田錦標，兼且出戰香港盃跑過季軍。 「飛雲」做足試閘功夫才上陣。 不過，喺一年幾之前黃婉曼同埋馮柏基就一齊中籤，最後佢老公引入咗一匹PPG來港，就係今日出戰第5場四班1400米嘅「飛雲」，究竟可唔可以一鳴驚人？其實過往馮柏基就養過「薑餅人」同埋「天氣先生」，「薑餅人」先後由沈集成同埋方嘉柏訓練，各自都贏到2W，反而喺韋達馬房嘅「天氣先生」在港8戰全部輸晒，近都未近過，但由於其毛色灰白，退役後就訓練成為儀仗馬。 至於今次呢匹「飛雲」由方嘉柏訓練，相信黃婉曼同馮柏基都充滿期待，事關過往「薑餅人」同埋「跳出香港」都喺柏廐取得成功，當然希望「飛雲」一樣可以攞到好成績。