嘉熙尾場再起風雲 12/02/2024 上周三送歲戰，冇咩人估到只得1匹坐騎嘅陳嘉熙憑「鈁糖武士」攞到兔年最後1W，亦係佢季內第3W，兼且全部都喺谷草取得。 「風雲武士」上仗初戰1400米輕勝而回。 而喺今日大年初三賀歲賽，陳嘉熙咁啱又係只騎1駒，亦係跑尾場兼且係「鈁糖武士」同主馬「風雲武士」，莫非佢可以由兔年贏到龍年？ 陳嘉熙 其實「武士」系馬主田啟文都算支持近年處於弱勢嘅陳嘉熙，「鈁糖武士」上季7戰都係由佢策騎，結果取2冠1季，今季即使最終用過布文、何澤堯同埋霍宏聲，但最後都係由陳嘉熙幫手攞到第4W。至於今次「風雲武士」質素更令人期待，事關此匹由希斯訓練嘅3歲PPG，3次出賽得2冠1亞，剛戰升上三班增程初跑1400米抽11檔，都可以輕取對手個幾馬位，實力絕不簡單，點知今次潘頓應承咗蔡約翰嘅「鐵金剛」，「風雲武士」索性由陳嘉熙接手，熙仔都話多謝希斯同馬主田啟文畀機會佢，因為都知後駒質素唔簡單，依家先贏咗「鈁糖武士」亦增強信心，睇吓能否再贏埋「風雲武士」，咁就功德圓滿啦！