薛恩方仔心星相通 03/03/2024 今日上演4歲馬經典賽事系列次關香港經典盃，唔少練馬師都搵咗海外高手來港客串，當中包括莫雅、巴米高、連達文同埋薛恩，其中薛恩仲好似做埋方嘉柏1日限定主帥咁，6匹坐騎全部來自柏廐，就知佢哋關係有幾好啦。方嘉柏今次搵薛恩主要嚟騎馬房打吡希望「意力迪迪」，呢匹4歲澳洲自購馬來港4戰全負，表現唔算太好，但話晒來港前贏過三級賽，另曾於G1考菲爾德堅尼 取得一席亞軍，證明有啲級數，兼且用薛恩特別合拍，4次合作得1冠2亞。 薛恩 不過，除咗「意力迪迪」，方嘉柏亦刻意讓薛恩同「心星」系馬匹再續前緣，將「信心星」、「仁心星」交晒畀佢操刀，話晒騎者曾夥拍「顯心星」攻下香港短途錦標。呢兩匹質新馬都極有潛質，第2場「信心星」跑咗兩場都有強橫追勢，剛戰跑田草1200米抽12檔姍姍來遲得季軍，今次梗係有機會上位；而「仁心星」即使兩場抽外抽檔都有1亞1季，今次縮程跑返1200米應該更合腳法，即使再次抽外檔仍有機會補中。 信心星上仗田草1200米追入季軍。 另外，薛恩昨日仍在澳洲費明頓馬場上陣，結果成功起孖，先以Estriella揚威殷利殊短途錦標，之後策「愛天仙」勇奪G2布林美錦標。