水晶酒杯馬主當旺 10/03/2024 「酒杯」系馬主陳德華近年養馬運認真唔錯，上季就有「純金酒杯」一口氣贏5W，今季佢有份嘅曼勝團體拍賣馬「獨角獸」攞到4W，佢自己嘅「水晶酒杯」亦贏1場，難怪成日見到陳生影頭馬相。 水晶酒杯（右）回師贏馬的直路賽再出擊。 見到自己嘅馬攞到成績，固然開心，但陳德華都冇忘記已經退役嘅愛駒，啱啱禮拜三身在澳洲悉尼嘅陳生仲去咗專為退役馬匹而設嘅Coromandel Agistment，探吓佢養過嘅退役馬「聰明申報」、「甜酒杯」、「星酒杯」同埋「型酒杯」，就知陳生係錫馬之人，即使愛駒完成競賽生涯，都會安排佢哋安享晚年，真係好難得。 馬主陳德華 今日「水晶酒杯」出戰第8場三班1000米，喺剛周四返回香港嘅陳德華梗係會入場為愛駒打氣，話晒愛駒前仗先贏三班同程，剛戰轉跑無根據嘅泥地搏失，不足為據，而陳生即使覺得愛駒可以應付1200米，但部署就交晒畀呂健威決定，今次回師贏馬路程直路賽，自然係刻意安排，況且有運抽到靠近看台嘅14檔，改用手風算順嘅意大利好手艾兆禮，可望繼續交出好成績。