艾道拿連續兩期起孖 紅海風帆再啟航 16/03/2024 要數近期最旺嘅騎師，澳洲好手艾道拿肯定係其中之一，事關對上兩期佢都成功起孖，兼且憑「加州星球」捧走女皇銀禧紀念盃，攞到佢在港首個一級賽，季內頭馬數字突破20場之餘，亦同告東尼合作擦出火花。 「紅海風帆」季初配艾道拿得亞軍。 不過，今日沙田賽事，艾道拿並無為東廐馬效力，但作為當紅騎師，依然不乏支持，除咗同鄉蔡約翰、希斯，亦得到方嘉柏、徐雨石、伍鵬志、文家良等人提供坐騎，相信騎者有權爭取3連捷，其中第3場四班1200米草地嘅「紅海風帆」就值得留意。 文家良 現年3歲嘅「紅海風帆」其實在港頭3次出賽都係由艾道拿執韁，即使未能取得頭馬，卻取得3個亞軍，證明人馬合拍，可惜之後佢就失去帥印，然而此駒整體演出卻未見太大進步，之後更抖過兩個月。嚟到1月尾艾道拿終於可以騎番「紅海風帆」，可惜只跑第7名，剛戰改用楊明綸轉爭谷草1000米卻得季軍，今次回師最正宗嘅田草1200米，文家良決定重配艾道拿，埋門亦刻意安排人馬作快跳，加上操練工夫完整，今場整體對手唔算太強，手風甚順嘅澳洲騎師可望為「紅海風帆」打開勝門。 艾道拿