威哥夠義氣撐到盡　希威森復出執金 20/03/2024 希威森喺上個月中因為陣上蓄意撞梁家俊，結果畀競賽小組判佢不恰當策騎，重罰停賽6日，期間都損失唔小，事關近期由佢策騎嘅4歲馬「禪勝輝煌」，就改用董明朗出戰香港經典盃跑第2名，白白冇咗唔少獎金。不過，喺上個禮拜二見到希威森可以操番「禪勝輝煌」，以為佢可以重奪帥印夥拍馬兒跑香港打吡大賽，點知幕後最終決定請布宜學過嚟幫手，而森仔都唔話得，就算依家冇份跑，都繼續幫手為此駒快跳考驗，工作態度100分。 呂健威、希威森 始終「禪勝輝煌」今次換人係馬主意思，希威森則會改騎「勁速威龍」爭打吡，而今晚希威森終於刑滿復出，威哥決定用行動支持呢位今季幫自己贏咗10W嘅愛將，分別有「威威鬥士」同「金發盛世」攜手出擊，當然值得留意。 「金發盛世」前仗由希威森勝出谷草1200米。 尤其尾場三班嘅「金發盛世」，自去年11月初復出後，一直表現平平，點知前仗重配希威森跑谷草1200米輕取對手個幾馬位，表現出色，剛戰由潘頓接手反而只得季軍，今次再起用森仔，抽5檔亦好跑，睇吓能否助騎者復出即有進帳。