勝多多丁仔挽頹勢 31/03/2024 現時共有3位倉主頭馬數字未達雙位數，就係鄭俊偉、徐雨石同埋丁冠豪，米高哥、石哥各自有8W，但佢哋已經收過兩封警告信，形勢危急。而未試過唔達標嘅丁冠豪，暫只得4W，護級難度極大，但佢呢一刻應該至少係想盡快打破悶局，事關對上一次贏馬要數到今年1月24日嘅「世澤歆星」，超過兩個月無馬贏。 丁冠豪 嚟到今日沙田賽事，丁廐罕有強陣出擊，派5駒參戰，當中「手錶之星」、「大浪圖田」同埋「勝多多」都係近績唔差嘅馬，有機會幫馬房攞到久違嘅勝仗。第7場三班1400米嘅「大浪圖田」，雖然在港首戰三班田草1600米輸9個幾馬位，但剛戰縮程跑1400米除咗頭罩，演出大幅進步，以145倍大冷門身份殺入季軍，只係輸畀「馬林」及「鐵金剛」，既然證明跑短啲同埋冇配備更加好，丁師傅梗係幫「大浪圖田」再跑1400米，仲要有運抽1檔好位，睇吓練者能否順利扳回一仗啦。至於第8場隻「勝多多」，第2戰田草1200米已追得好，上仗再跑同程得第4更進一步，埋門連續3課都同「大浪圖田」拍跳，擺明呢對馬都會出擊。 「勝多多」剛戰第4走勢有進步。