勝利神駒黃智弘有航 03/04/2024 依家香港唯一嘅10磅仔黃智弘，由上季尾出道至今，暫時都仲未贏夠20場升格，整體成績真係唔標青，而佢喺2月中曾因為策騎「天生夠響」阻到人，畀競賽小組罰佢停賽3日，仲要佢上啲騎術指導課程，就知情況有幾嚴重。 「勝利神駒」（左）季內已兩勝四班田草賽事。 不過，睇番最近幾期表現，似乎呢個騎術指導課程有啲用，事關單計上個月，弘仔已經攞到4場頭馬，啱啱禮拜日最後3場賽事嘅坐騎「大才」、「旗幟鬥士」同埋「鈦易搵」全部入三甲，兼且幫「大才」爆冷建功，就連練馬師葉楚航都話佢嘅發揮愈嚟愈穩定，所以話明會畀多啲機會呢位10磅仔。 葉楚航、黃智弘 嚟到今晚沙田泥地夜賽，證明葉楚航唔係得個講字，佢將第3場四班1200米嘅「勝利神駒」交畀黃智弘，又有機會合作贏馬。呢匹5歲澳洲PPG今季明顯大熟大勇，今季先後贏過四班田草1200及1400米，但由41分加到52分後，最近兩場表現略為回落，為咗力爭今季第3W，航哥亦刻意求變，除咗轉嚟泥地試吓，更搵埋黃智弘減10磅，今次只孭119磅上陣，點都有啲優勢，況且有運抽1檔起步，更加易適應，值得重視。