利衍天下擺明搶攻 17/04/2024 雖然近一兩個月黎昭昇喺沙田曾有「領航宇宙」、「嘉寶神駒」建功，但整體嚟講佢嘅成績都係谷草好過田草，就以啱啱禮拜日為例，由潘頓策騎嘅質新馬「超力量」及「勝意」都係唔夠兩倍嘅一面倒大熱，點知一隻跑第2名，另一隻更三甲不入，搞到馬房全日食白果，認真無癮。 利衍天下先後5試大閘才出戰。 嚟到今晚返回谷草主場，黎昭昇立即強陣出擊，「花好月盈」、「魔法速遞」、「寰宇豐采」、「仁仁之寶」同埋「極速滿貫」季內曾於跑馬地建功，尾場「跑得好快」就強配潘頓，但都唔好睇小第6場四班1200米嘅初出馬「利衍天下」。 「利衍天下」後台極硬，事關馬主就係馬會主席利子厚同埋董事之一嘅陳衍里醫生，佢哋都唔係首次合作養馬，當中最出名就係曾贏主席短途獎嘅「天下為攻」，後駒當年初出即贏，而陳醫生個人名下嘅「激光天下」亦係一出即勝，證明佢哋都係相當急進，而今次呢匹「利衍天下」雖然舊年11月初先嚟到香港，但加加埋埋都試咗5課大閘，走勢唔差，絕對有備而來。況且鞍上人賀銘年上星期同女友Marion正式簽字結婚後，剛周日立即憑「一定美麗」建功，睇吓呢位新郎哥嘅旺氣能否延續至今晚，幫「利衍天下」一出即勝啦！