希斯600W在望 嘉應高昇值一班 05/05/2024 希斯喺2020年重返香港開倉，當時躊躇滿志，唔少人都對呢位澳洲殿堂級練馬師寄予厚望，相信佢可以為香港馬圈帶來巨變，同時引入不少良駒，可惜經過幾季後，令人覺得真係有啲雷聲大，雨點小，其成績的確不似預期，回歸香港後3季頭馬數字都只係得3字頭，亦無乜贏過大賽，難以令人留下深刻印象。 希斯 不過，今季希斯整體成績總算有改善，暫時已經攞到39W，相信要達到4字頭嘅難度唔大，況且佢兩次來港從練加埋已有599W，只爭1W就達600W大關，以佢今日嘅出馬陣容，應該可以完成目標，其中最多人留意一定係第10場二班1200米草地嘅「嘉應高昇」。 「嘉應高昇」上仗負頂磅仍可輕鬆取得3捷。 「嘉應高昇」呢匹3歲新西蘭PPG，都算係希斯今季代表作之一，5戰得3冠2亞，最近喺三班一口氣連贏兩場，剛戰更克服135磅兼11檔，輕取另一匹質新馬「龍之輝」個半馬位，難怪賽後希斯都話咁都贏得到，「嘉應高昇」絕對係一匹一班馬，並預計下季會係一匹好出色嘅短途馬，所以今次升上二班，唔使擔心能力問題，況且只負119磅，再配潘頓出戰，有望攞到今季第4W之餘，亦為希斯帶嚟在港第600場勝仗。 潘頓