龍之珍幫米高護級 05/05/2024 加埋收過兩次警告信嘅鄭俊偉，上季喺極艱難嘅環境下上岸，當中4W嘅「晴王」同埋上季尾打疊贏兩場嘅「愛馬善」絕對係功臣。到咗今季，米高哥繼續要打護級戰，暫時只得11W，兩場五班頭馬嘅quota亦用晒，尚欠5場四班或以上嘅頭馬先夠數，要喺餘下兩個月達成目標，真係唔容易，最慘鄭廐今季少咗「晴王」呢類可以一口氣贏幾場嘅明星新血，而且啱啱禮拜三谷戰嘅「富喜來」又搏失輸啲啲，或多或少構成一定打擊。 「龍之珍」周五朝由布文親自快跳。 不過，鄭俊偉亦冇因為搏失而灰心，今日沙田賽事繼續出擊，除咗有抖咗幾個月嘅「晴王」回師三班1400米外，出戰第7場四班1400米草地嘅J布新血「龍之珍」隨時成為馬房護級嘅重要棋子。呢匹3歲澳洲PPG身價唔簡單，2歲時喺拍賣會以52萬紐元（約260萬港元）成交，剛戰初出就跑1400米由布文策騎，唔知係咪抽14檔嘅關係，臨場有20倍，結果後上追至殿軍，表現唔差，經過一次熱身後，復課加強工夫，今次原班人馬再攻同程，即使唔夠運再抽14檔，但布文肯繼續騎，有望為米高哥攞到重要嘅護級頭馬。