馬主鼎力支持 何澤堯飲多杯 11/05/2024 隨住啱啱升格做大師傅嘅鍾易禮喺剛周三谷戰成功起孖，相信何澤堯今季要再贏「告東尼獎」嘅難度極高，但以Vincent今季受到停賽同傷患困擾，加埋只出賽233次，暫時都有30W喺手，只係落後鍾易禮11W，成績絕對唔失禮。以何澤堯近年成績，的確有唔少忠實馬主支持，其中一位就係「酒杯」系嘅陳德華先生，佢今日除咗將名下嘅「水晶酒杯」繼續用Vincent，更將自己有份嘅團體馬「獨角獸」都交埋畀呢位華將，隨時包辦第2口孖寶都唔出奇。 馬主陳德華（左）、呂健威 講起「水晶酒杯」，估唔到今季由蔡約翰馬房歸隊轉往呂廐後，表現更上一層樓，兼且成為一匹直路賽專家，季內4戰田草1000米攞到3冠1亞，剛戰更於何澤堯胯下建功，陳德華坦言非常開心，事關嗰場係Vincent傷愈復出後首場頭馬，自然更具意義，今次再跑首本路程，老對手「星際快車」都避開佢改跑尾場三班田草1200米，有權再下一城。 何澤堯 至於今季累積5W嘅「獨角獸」，上仗改跑泥地一哩竟然可以克服不利嘅13檔後上贏馬，搵多一條出路，今次再跑同程重配幫此駒攞咗兩W嘅何澤堯亦合理，檔位亦比上次好，有機會連捷。 「水晶酒杯」上仗取得季內第3次直路賽勝利。