上仗改跑法即變身 全神貫注打鐵趁熱 08/06/2024 啱啱禮拜日「浪漫勇士」揚威日本安田紀念賽，沈集威自然威到盡，唯一可惜係另一匹香港代表「遨遊氣泡」真係唔識左轉，最終跑尾2，慶幸姚本輝嗰日喺本地賽事憑「全神貫注」爆冷攞番個安慰獎，後駒今日匆匆再出又跑五班1400米，都係想打鐵趁熱贏多場。 姚本輝 雖然啱啱以31倍冷門開齋，但馬主陳俊寧賽前唔係冇信心，因為愛駒埋門試閘走勢唔錯，仲叫咗屋企人買啲WP，結果齊齊有斬獲，梗係開心。 「全神貫注」剛周日爆冷勝出五班1400米。 此外，陳生亦大讚姚本輝將「全神貫注」訓練得好好，事關愛駒只得3歲，心智上其實未算太成熟，所以出賽初期安排隻馬喺唔同場地測試性能，直到最近試閘發現擺前走效果好，上場立即改跑法，結果成功變身。至於點睇「全神貫注」前景？陳生話最緊要愛駒健康同埋持續進步，令佢可以同家人繼續享受賽馬，今次姚本輝安排呢隻馬匆匆再出，都係覺得質新馬夠體力可以喺五班贏多場，抽5檔亦唔算差，機會樂觀。 馬主陳俊寧（左）