天下寵兒周嘉儀 01/07/2024 講起新聞主播升呢做馬主，相信馬迷最有印象就係黃婉曼，事關除咗佢老公馮柏基係馬主，佢亦係跳出香港團體成員，名下嘅「跳出香港」亦試過贏分級賽，認真犀利。估唔到最近又有一位前新聞主播榮升馬主，就係現年41歲嘅周嘉儀（Venus），佢個人名義嘅3歲澳洲PPG「天下寵兒」今日首度登場，角逐頭場四班直路賽，交由華將一哥何澤堯執韁，相信會有唔少人留意此駒走勢。 馬主周嘉儀 雖然之前都會見到周嘉儀入場睇跑馬，但話晒第一次養馬做馬主，當然格外緊張，有時愛駒朝早喺沙田馬場試閘，佢都會落嚟睇吓，了解「天下寵兒」嘅進度，其中4月初愛駒試過試閘前走甩咗，慶幸其後愛駒開始成熟，走勢開始穩定，早排喺從化試閘更以第3名衝線，進度漸入佳境。依家呂健威正值爭冠嘅關鍵時刻，肯定係覺得「天下寵兒」有一定水準先會出賽，況且呂廐啱啱有「包裝天將」一出即勝，今次「天下寵兒」初出跑直路賽抽13檔好位，同樣不能忽視。 天下寵兒試閘表現漸成熟。