上仗慢閘照贏　領航傳祺食得唔嘥 10/07/2024 自從牌照委員會早前公布修訂練馬師續牌最低標準，變相令鄭俊偉、徐雨石達標上岸後，冇咗護級壓力嘅米高哥的確係放鬆咗，但又唔代表馬房完全收爐嘅，始終頭馬無人會嫌多，就算要留力下季再拚，唔代表季尾階段完全唔搏，早排鄭廐就憑「晴王」攞到今季第17場勝仗。 鄭俊偉 嚟到今晚跑馬地煞科戰，鄭廐派出4駒上陣，當中包括新勝馬「領航傳祺」，似乎都係想打鐵趁熱執多W先抖暑。 潘明輝 「領航傳祺」季中加盟鄭俊偉馬房後，上陣次數唔算少，但表現唔算好，上仗跌至26分跑田草1600米，當時如果再輸嘅話，萬一再畀評磅員減分，隨時畀人淘汰，點知馬匹及時回勇後上贏馬，蹄下敗將包括上周六建功嘅「美麗多盈」，證明能力不差。聽馬主胡啟聰爸爸胡偉林講，佢覺得「領航傳祺」應該有分喺手，上仗慢閘都贏係唔簡單，而佢一早打算讓此駒跑埋呢場1800米先抖暑，戰意唔使擔心，即使抽12檔起步，續用潘明輝有權贏多場。 「領航傳祺」上仗田草1600米落重飛得手。