張明敏堅持報1400米 人和家盛贏到你唔信 28/09/2024 有「愛國歌手」之稱嘅張明敏，同時都係一位馬主，今季佢嘅養馬運就相當唔錯，佢同幾位老友夾份嘅兩匹8歲老馬「人和家興」同埋「人和家盛」，已經先後交出頭馬，兼且都係爆冷建功，「人和家興」剛周日以22倍食尾胡贏二班田草1200米。 馬主張明敏 而「人和家盛」仲犀利，喺開鑼日以57倍贏出跨季孖寶，計埋上季尾72倍贏馬，連續兩場爆冷W，真係非常罕見。 沈集成 抖咗唔夠1個月，「人和家盛」又再上陣，跑番四班田草1400米，即使檔位平平，但繼續由今季神勇嘅潘明輝執韁，隨時又畀到驚喜大家。 潘明輝 不過講起呢匹8歲老馬跨季連捷，原來最大功臣就係張明敏，聽沈集成講番，佢話開鑼日嘅四班1400米，佢一早打算派廐侶「熾烈神駒」上陣，反而冇諗過畀「人和家盛」出擊。 「人和家盛」開鑼日再次爆冷贏田草1400米。 但張生覺得既然愛駒上季尾贏1400米，因此就算係馬房次選，都叫成哥幫手報跑開鑼日嗰場，正因為張生嘅堅持，令愛駒以馬房副選身份贏馬，成哥都覺得隻馬依家跑1400米先最啱腳法，所以今次再攻同程，負磅又唔算重，睇吓呢匹8歲老馬能否攞到3連捷？