紅愛舍韋達再省招牌 01/10/2024 練馬師只要交到成績，自然獲得更多馬主支持，好似韋達咁，上季尾接收咗黎昭昇馬房嘅「紅逸舍」，果然交足功課，加盟韋廐後跑咗6場，只得1次冇獎金收，其餘5戰得2冠3亞，上周三喺谷草復出跑谷草1000米亦順利建功。既然有表現，難怪「紅逸舍」馬主李卓然，喺暑期就將佢同太太夾份嘅「紅愛舍」交埋畀韋達訓練，今日轉倉初出跑第10場三班1400米，如果可以轉倉即贏，肯定省到馬房招牌立立令。 韋達 講開呢匹「紅愛舍」，上季首戰已經喺二班1400米得亞軍，只係輸畀今季贏G3慶典盃嘅「中華盛景」，可惜此駒喺去年11月中出戰樂聲盃遇上落樓意外，即使復出首戰都跑第2名，但其後卻愈跑愈差，兼且降至三班。自從「紅愛舍」加盟韋廐後，韋達亦非常重視，埋門親自試咗兩課，最近亦搵埋此駒好拍檔楊明綸試谷閘，拉士一畀反應甚佳，今次用綸仔跑三班1400米強項，配合2檔好位，不能忽視。 「紅愛舍」上月試谷閘得第2名。