雙贏騰龍四海自己友 13/10/2024 馬主圈一向不乏專業人士，就好似有部分醫生喜歡賽馬運動，其中一位就係莊文煜醫生，莊醫生除咗有自己嘅醫務中心外，佢近年先後養過「傲龍駒」及「騰龍駒」，呢兩隻馬退役前加埋交到10場頭馬，成績唔失禮，依家佢就同朋友分別夾份養咗「雙贏」及「騰龍四海」，咁啱今日同場較量，齊齊角逐第8場四班1400米，既然叫雙飛，睇嚟莊醫生真係好有機會拉頭馬。 雙贏 先講吓近績較好嘅「騰龍四海」，呢匹由文家良訓練嘅4歲澳洲PPG，上季跑咗3場陣上好似冇咩嘢睇，但其實就愈輸愈近，上月中復出跑田草1400米，即使檔位麻麻，但後上追至亞軍，只係輸畀「十二神將」馬頭位，走勢有明顯進步，復課有正常操練，埋門安排喺草地拍跳，就算今次再攻同程檔位更差，依然有望克服。 騰龍四海 至於莊醫生另一匹愛駒容天鵬馬房的「雙贏」運氣就好啲，抽到1檔起步，無疑此駒上仗復出跑谷草1650米表現平平，但睇番呢隻馬上季就係熱身一仗後上名，話唔定今季部署照辦煮碗，同埋經過上場開氣，對今次縮程跑1400米更有幫助，隨時畀到驚喜大家。