木火龍駒撻着晒 16/10/2024 鄭俊偉上季有前何良馬房副練梁明偉過嚟幫手，最終成績都唔錯，埋單有19場頭馬，而一批跟隨梁明偉加盟嘅賽駒，當中主要係張家偉嘅「木火」系表現亦好，9歲老馬「木火同明」上季有進帳，而馬房評分最高嘅「木火兄弟」於上季尾初跑谷草一哩即贏後，今季復出亦成功攞到跨季孖寶，暫時只係得質素較新嘅「木火龍駒」未贏，而後駒今晚角逐第1場五班1200米，相信鄭俊偉都想盡快為馬兒建功交代。 鄭俊偉 5歲新西蘭PPG「木火龍駒」上季的確表現平平，10戰全部輸晒，最叻只喺谷草1200米跑得第5名，上季尾落到五班增程轉場跑泥地1650米亦交唔到成績。不過，經過一季適應，兼且暑假再獲減幾分，上月尾復出跑五班谷草1200米，能夠展現前速之餘，最終放到拉士先輸畀「賢心星」唔夠1個馬位得季軍，首次入三甲，復課後由梁明偉一手操，由於楊明綸要停賽，今次由華將一哥何澤堯接手，睇吓能否順利打開勝門？ 木火龍駒（左）上仗谷草初次入三甲。