張月勝旺勢展雄威 03/11/2024 最近內地嘅玉龍集團威到不得了，舊年年尾佢哋豪花540萬澳元購入嘅馬女「精緻之道」，今年運去澳洲發展攞到好成績，最近仲喺G1覺士盾造成場地紀錄時間大炒日本代表「先見」8個幾馬位，作為玉龍集團話事人嘅張月勝，能夠揚威呢項澳洲咁重要嘅一級賽，自然非常開心。其實依家玉龍集團除咗喺澳洲、歐洲擴展勢力外，張月勝近年都有喺香港養馬，對上一匹「展宏圖」上季加盟廖康銘馬房後攞到2W，可惜去到4月中戰死沙場，相當可惜。 展雄威（右）上月中試草閘負於包裝明駒得第2。 既然不愁貨源，張月勝今季就引入4歲澳洲PPG「展雄威」來港，繼續交畀今季成績更進一步嘅廖康銘訓練，更令人憧憬。呢匹「摘星勇驥」子嗣喺澳洲8戰只得1冠，另有2亞2季，演出都算準繩，最後一仗喺費明頓跑表列賽得季軍。自今年3月中抵港後，廖康銘都畀咗好多心機，先後試咗6課大閘先上陣，最近喺沙田試1000米草閘，拉士一鬆衝上嚟跑第2名，走勢好吸引，今次在港首戰跑三班田草1200米抽1檔起步，睇吓張月勝能否挾勇奪覺士盾嘅氣勢，助「展雄威」在港一鳴驚人。