女機師馬販派斯出品 家耀 05/11/2024 S3-6路程1400米三級賽香港賽馬會錦標，今屆極有機會由有香港背景嘅馬捧走錦標。由佐利及佐倩桃訓練嘅「女機師」係澳洲今季冒起嘅新星，馬主正正係成功引入「精英大師」與「旺蝦王」等多匹明星馬嘅著名馬販派斯名下好價賽馬公司。呢匹由好價賽馬公司自行培育、出自「智能導彈」嘅4歲馬女，跑過10次交出5W2P，佐倩桃話呢匹馬之前唔係幾好彩，唔係排檔差、就係遇到強敵，搞到要到上個月中先捧走諾活錦標第一次贏分級賽。佢話響幾個月前已鎖定「女機師」出戰香港賽馬會錦標，所以前仗特登降低弦線跑萬富圍嘅讓賽，確保穩奪呢場1400米G3嘅入場券。