輝煌精英唔等田草 20/11/2024 雖然上季降低咗練馬師最低續牌標準去到14場頭馬，但丁冠豪始終未能喺上季尾達標，最終只得12W要收警告信。到咗今季丁廐唔夠40駒，支持不算強，自然處於捱打局面，最終9月尾先憑「大將鵰神」攞到開齋頭馬，然後等到今個月初再輪到廐內質新佳駟「輝煌精英」為馬房攞到第2W。可惜當日喺凱旋門拉頭馬時，丁師傅畀牽引頭馬繩嘅鐵鈎刮傷左手手掌，爆晒缸之餘，亦面露極痛苦神情，結果要去醫院縫針，相信丁師傅都估唔到咁難先贏到一場頭馬，都要搞到見血。 丁冠豪 不過，就算左手受傷要包紮，但丁冠豪喺第二朝已經立即落馬場督操，始終馬房要爭成績護級，真係睇少一陣都唔得嘅，而佢今晚派「輝煌精英」轉場初跑谷草1200米，唔知會唔會勾起佢被割傷嘅回憶啦，但呢個部署就顯見心思。無疑呢匹4歲PPG上季出道至今都係專攻田草，剛戰喺三班田草1200米亦贏得出色，但二班此程編排唔多，要等到下個月22日先有，既然「輝煌精英」近況出色，無理由浪費，況且就算真係等到嗰場，都一樣有可能喺二班遇到「氣勢」或「魔術控制」，既然係咁，倒不如轉嚟谷草試吓，對手肯定冇咁強，睇吓能否為丁師傅攞到今季第3W？