班德禮100W攞彩 20/11/2024 英國好手班德禮雖然去年呢段時間畀競賽小組罰佢提供馬匹資訊畀不恰當人士，結果停賽2個月兼罰咗30萬，但佢最終決定繼續留喺香港，而全季埋單都有39場頭馬，真係一啲都唔失禮，反映佢有唔少支持。 班德禮 到咗今季，班仔起步就慢咗少少，暫時出賽次數都未夠100次，只得4場頭馬，但原來佢喺香港已累積98W，只差兩場就夠100大關，難得今晚跑馬地賽事即使只得5駒，卻手執「凱旋七福」、「三代同心」同埋「多利彩駒」，話唔定可以起孖贏夠100W都唔出奇。 先講吓告東尼訓練嘅「三代同心」，上季唯一頭馬正正由班德禮建功，但其後演出不進反退，今季輸多兩場後已經落到五班，前仗重戴眼罩重配班仔跑谷草1200米都係得第9名，但上仗已經有起色後上得季軍，今次繼續由班仔騎排2檔好位，有望憑班底補中。至於尾場「多利彩駒」上周因為颱風腰斬尾3場賽事搞到無緣上陣，今次隔一個禮拜用晒王牌、保護權出擊，單計上仗抽外檔後上不敵「勇敢巨星」嘅走勢，依家留喺三班再跑谷草1200米肯定有競爭力，睇吓能否成為佢第100W啦？