展雄威阿麥延續精緻 24/11/2024 如果莫雅今日未能喺東京競馬場夥拍「多產巨匠」捧走日本盃，今年全球最佳騎師殊榮就由麥道朗奪得，呢位好手今年喺香港、澳洲都贏咗唔少大賽，當中最令人印象深刻應該係策騎「精緻之道」刷新場地時間紀錄，拋離對手攻下覺士盾，原本呢匹馬女都有報爭香港盃，但最終唔嚟香港，咁對麥道朗都係好事，萬一「精緻之道」及「浪漫勇士」喺香港盃碰頭，魚與熊掌下，真係唔知點揀好。 「展雄威」上仗初出即拚獲季軍。 雖然「精緻之道」唔嚟香港，但麥道朗今日亦會為此駒馬主玉龍賽馬集團嘅話事人張月勝效力，事關張生名下嘅「展雄威」今次改用佢操刀，話唔定嚟到香港都可以幫呢件綵衣建功。呢匹4歲澳洲自購馬上仗在港首次上陣，立即喺三班田草1200米跑第3名，走勢唔算差，反映現時評分唔太吃虧，復課後立即加強操練，早排快跳試草地拉士造21秒2，狀態肯定大幅提升，今次加強配搭用麥道朗，有望贏馬補中。 麥道朗