澳洲試閘大勝9馬位　膨才初出蘇哥利 01/12/2024 雖然蘇偉賢啱啱未能憑「上市魅力」再添頭馬，但其實Chris哥之前3期都有進帳，手風都算好，兼且上周日有「康樂高球」爆冷一出即勝，似乎賢廐呢批質新馬能力唔差。到咗今日沙田賽事，賢廐派7駒上陣，當中有「膨才」及「俊才」初試啼聲，不妨多加留意。 「膨才」周四朝由何澤堯彈閘夠純熟。 「才」系馬主梁麟炳近年喜歡與不同練馬師合作，但大部分都係華倉為主，包括伍鵬志、葉楚航同蘇偉賢，Chris哥訓練嘅「宏才」無疑係易位難贏，只得1場頭馬，卻有7亞6季，演出算準，難怪將兩匹K布新血都放入賢廐。純計餐士，梁麟炳嘅3歲愛爾蘭自購馬「俊才」要喺尾場三班爭勝的確有難度，反而女兒梁頴頤嘅「膨才」更令人憧憬。呢匹澳洲PPG來港日子唔算長，但原來喺澳洲一早做好工夫，其中一課閘大炒對手9個幾馬位，難怪來港試4課大閘嘅走勢都吸引。另外，原來何澤堯同蘇偉賢自從上年10月1日憑「新力高升」攜手贏馬後，逾一年未試過合作建功，睇吓今次能否憑「膨才」帶來突破啦？ 蘇偉賢