愛心神駒衝3連勝 08/12/2024 在港第2季開倉嘅廖康銘（Mark），估唔到今季大爆發，暫時以20場頭馬喺練馬師榜排第2位，僅次於伍鵬志，相信季前應該冇咩人估到。嚟到今日香港國際賽盛事，雖然阿Mark暫時未有馬可以參與4場G1，但相信佢都想喺一班外賓面前贏馬攞威，而喺其他場合的廖廐3匹參戰馬中，應該以第6場三班1800米嘅「愛心神駒」機會最高。 馬主余國賢 來自阿根廷嘅「愛心神駒」前季評82分插入二班，但跑咗兩季都冇咩嘢睇，點知今季轉投廖康銘馬房後，演出判若兩駒，季內初出除晒所有配備即贏三班田草1600米，翌仗增程跑2000米再下一城，漸漸展現馬匹本身應有嘅能力。至於馬主余國賢呢輪就喜事重重，早排先當選國際毽球聯合會主席，之後輪到愛駒建功，佢就大讚廖康銘好有心機，接手「愛心神駒」後一步一步咁做足工夫，由一哩贏到2000米，表現出色，佢亦相信愛駒仲有進步空間，而廖廐嘅表現亦愈來愈好。今次「愛心神駒」繼續留喺三班配潘明輝，跑1800米問題不大，睇吓能否順利3連捷？ 廖康銘