神煞金剛輪到交代 11/12/2024 頭場五班大長途，只得8駒競逐，單係葉楚航就佔咗3隻，似乎航哥對呢場頭馬志在必得，而喺佢3匹參戰馬中，包括一對同主馬「神煞金剛」及「神虎金剛」，馬主就係支持咗葉廐十幾年嘅許晋奎，相信航哥好想幫許生贏番場。 葉楚航 雖然近年許晋奎嘅「金剛」系賽駒表現平平，「神魔金剛」以處女馬身份出局，「神火金剛」只喺五班贏1場，但許生依然對葉楚航不離不棄，目前名下4駒包括兩匹K布新血「神燦金剛」同埋「神異金剛」都係交畀航哥訓練，所以航哥都好想盡快為呢位資深馬主影番張頭馬相。 「神煞金剛」上仗谷草2200米獲第2名。 至於今晚頭場嘅「神煞金剛」及「神虎金剛」，無疑整體表現唔太突出，才會雙雙落到五班，但「神煞金剛」經過一季多嘅適應後，最近愈跑愈近，兼且證明跑大長途威力比較大，剛戰首次扳上谷草2200米，拉士狂追只輸個頭畀已經升上四班嘅「竣誠駒」，今次再攻同程埋門由艾兆禮一手操，都係對住差唔多嘅對手，有望補中。