飛躍精英田泰安追數 11/12/2024 田泰安啱啱禮拜日嘅香港國際賽食白果已經慘，更禍不單行嘅係喺香港一哩錦標，安仔嘅坐騎「禪勝輝煌」以第4名衝線，但之後畀跑第6名嘅「越駿歡欣」抗議，最終競賽小組裁定抗議得直，「禪勝輝煌」除咗被貶落第6名，令安仔獎金少咗截，佢更被罰停賽3日，由下個禮拜三起去到拆禮物日後，再加6萬蚊罰款，變相令安仔可以放聖誕假。 田泰安 停賽兼罰款，對騎師嚟講都真係幾傷，田泰安今晚要贏馬補數，而喺佢8匹坐騎中不妨吼實第8場四班1200米嘅「飛躍精英」。呢匹賀廐馬上季尾贏咗場五班田草1200米後，以為可以慢慢反彈，點知今季開鑼日復出跑贏馬路程，卻喺最後170米跳影，之後再跑兩場都出現呢個狀況，搞到賀賢都驚咗，唯有讓此駒轉戰谷草，結果前仗喺谷草1200米輸條頸得亞軍，證明跑馬地性能冇問題，上仗就因為直路無位上才三甲不入。雖然今次以40分馬身份升上四班上陣，對手加強卻孭少20磅，亦令安仔可以重掌帥印，肯定加倍肉緊，值得留意。