米奇進軍經典一哩賽 01/01/2025 蕭百君家族嘅紅黑兵團喺世界各地都有養馬，近年亦鍾意安排喺英國交出成績嘅質新賽駒運嚟香港服役，上季佢哋引入攻下1993米G3漢普頓宮錦標嘅「惠比壽」來港，點知因為腳患問題嚴重，未出賽已經退役。 「米奇」上仗贏1600米有餘未盡。 不過，即使「惠比壽」無功而還，無損佢哋對引入英愛自購馬嘅信心，今季就將同樣來自英國皇家雅士谷賽期，但揚威1600米大不列顛錦標嘅「米奇」來港，結果呢匹出自「戰士召喚」嘅子嗣未有令佢哋失望，去年11月尾在港首戰已經喺田草1400米得殿軍，上仗增程跑1600米立即補中，反映馬匹迅速適應水土。 雖然「米奇」上仗只係贏初出嘅「百賀飛駒」一條頸位，但後駒喺澳洲跑G1玫瑰崗堅尼得季軍，充分反應「米奇」嘅級數，馬主蕭劍平都話當初引入此駒都係想進軍今季嘅4歲馬經典大賽。即使上仗取勝賽後被加7分至83分，但今日呢場三班1600米係85分上限組別，令「米奇」暫時唔使升班面對強手，今次繼續由布文策騎，以蔡約翰近期嘅強勢，「米奇」應該可以再食尾胡然後挑戰香港經典一哩賽啦。