初出跑1400有揸拿　南區之星一步到位 26/01/2025 羅富全上周二舉行馬房團年宴，席間全哥就話下半季會繼續努力爭取更多頭馬，報答一眾馬主嘅支持。講起一直支持羅廐嘅馬主，又點少得南區之友團體嘅陳文俊、方文傑、黃靈新及黃焯添幾位，佢哋除咗有夾份嘅「南區旺」交畀全哥訓練，團體馬「南區有」及K布新馬「南區之星」都係擺喺羅廐，可惜「南區旺」搏咗3季都係得個近字，最叻只得兩個亞軍，為咗盡快交代，今次首度登場嘅「南區之星」，必定打快攻。 「南區之星」最近贏谷閘走勢悅目。 現年3歲嘅新西蘭PPG「南區之星」，今次初出即跑田草1400米，無疑對一匹無經驗嘅質新馬嚟講，絕對係考驗。不過，原來羅富全唔會立亂安排啲馬初出跑1400米，如果作出呢個部署，往往都有成績，對上4匹初出跑此程嘅羅廐PPG攞到1冠2亞，分別係「遨遊武士」、「保羅傳奇」同埋「日日友」，而呢匹「南區之星」本身係「超超比」嘅同父馬，長力有根據，首戰跑1400米唔係無道理，況且埋門不論喺從化抑或跑馬地試閘都率先衝線，擺明操好先出，有權一鳴驚人。