十二神將升班都唔怕 31/01/2025 蘇偉賢與何澤堯呢對騎練組合近期合作表現唔錯，單係一匹「膨才」3戰全勝未逢敗績，已經拍爛手掌，今年元旦日Vincent亦為「十二神將」拎到季內第2W，今日後駒升上三班再跑1400米，繼續由呢位華將一哥執韁，究竟能否為蘇偉賢、何澤堯呢對騎練組合由龍年贏到蛇年呢？ 十二神將上仗田草1400米取得季內第2捷。 5歲澳洲PPG「十二神將」今季踏入大熟期，5戰得2冠及3次第5名未甩過獎金，剛戰跑1400米擺前走擊敗「時尚歡欣」及「皇仁歡星」，後駒翌仗升上三班跑1600米補中，反映賽事水準唔差，「十二神將」今次升上三班未必太吃虧。 蘇偉賢 聽馬主福仕團體嘅經理人容樹恒教授講，佢話愛駒性能比較均速，所以都係因應馬匹喺邊個排位先知點跑，既然上仗出閘可以擺喺前面，索性跟前順住走，結果順利掄元，容教授話蘇偉賢、何澤堯都值得一讚，而另一位馬主團體成員徐和邦醫生覺得就算「十二神將」要升上三班，負磅輕都仲有競爭力，今次正正係孭少10磅，睇吓能否連捷兼拎到季內第3W？