康樂高球繼續運財 09/02/2025 蘇偉賢今年處理啲質新馬頗為急進，亦有部分成績理想，好似K布PPG「膨才」3戰未逢敵手，今日輪到兩戰全勝嘅「康樂高球」升上三班再跑田草1200米，究竟能否好似「膨才」咁繼續贏呢？ 蘇偉賢 「康樂高球」喺去年11月尾初次上陣，當時係43倍大冷門，結果力壓「天賜喜」、「帥帥友福」、「包裝福星」及「不同世界」建功，其後呢4匹蹄下敗將成績極佳，就知「康樂高球」呢場頭馬水準極高，難怪上仗再出孭重磅抽外檔都輕鬆掄元。聽馬主黃士心講，原來「康樂高球」初出嗰場，佢已經買咗1萬蚊WP支持愛駒，而由於前仗水準高，所以上仗自己都有信心，所以再買多啲WP，結果再贏多場，而黃生都話「康樂高球」係一匹好馬，前景樂觀，但最重要係健健康康，今次初上三班孭少10磅，對手唔強，可望取得3連捷。 康樂高球在港兩戰全勝。 除咗「康樂高球」，黃生囝囝黃進達嘅「快樂高球」同日跑第3場四班1000米，呢隻馬近兩仗喺同程都得亞軍，今次改用艾道拿抽好檔，睇吓兩父子能否同日一齊拉頭馬啦？