柯敏來港客串6周 12/02/2025 剛戰沙田日賽，何澤堯、潘頓、鍾易禮、楊明綸落樓受傷需養傷缺陣，一下子冇咗4位騎師，加上未來日子仍有騎師停賽，馬會都立即搵到馬昆、杜苑欣兩位喺周日來港擔任1日雷霆救兵。據悉馬會一直想搵更多騎師前來作短期客串，以紓緩人手不足的情況。昨日澳洲傳媒透露，現時長駐澳洲昆士蘭的柯敏，將獲發6星期短期客串騎師牌照。 柯敏（Getty Images圖片） 現年27歲嘅柯敏向澳洲傳媒表示，自己唔係輕磅騎師，但可以得到機會前來香港客串，對自己而言的確係夢想成真，現時唔知道之後發展會點，但可來港策騎，自己會把握機會，盡量贏多啲頭馬。對上一位前來香港嘅昆士蘭騎師就係湯普新，湯普新舉家來港，立心在港長駐。柯敏去年12月出席晨課時，曾被賽駒咬斷右手指尖，而柯敏曾於2018年來港探路。截至2月11日，柯敏喺昆士蘭騎師榜以67W排名第3，係當地前列騎師，佢暫時會在當地騎到本周六鷹園馬場賽日為止。 另外，莫雅、麥道朗、金誠剛、麥當能據知都會來港客串，馬會日內將會有公布。