奧爾民望長駐香港 19/02/2025 客串騎師奧爾民昨早首度於晨操亮相，呢位27歲澳洲籍騎師由同鄉湯普新帶領，熟習沙田馬場環境，入馬房參觀，奧爾民亦同布文傾咗好耐，並去烽火台睇試閘。奧爾民今晚只得呂健威馬房「魔法豆」1匹坐騎。奧爾民目前喺昆士蘭贏咗71場頭馬，排騎師榜第2。騎者奧爾民明白突然來港客串6星期肯定會影響爭冠，不過他認為來港機會難得，並表明自己的長遠目標，就係希望可以在香港取得全季騎師牌照。 奧爾民 呂廐找外援圍攻經典盃 另外，呂健威將有5駒參加下月2日舉行的4歲經典賽事系列次關香港經典盃。在現時騎師人手短缺之下，呂健威希望盡快落實配搭，新勝的「遙遙領先」卻暫未有定案，因為艾兆禮已揀定「優才」，至於其餘4駒悉數找來海外高手出戰，「包裝福星」及「包裝天將」，早已經落實由莫雷拉及薛恩策騎，上仗喺經典一哩跑第2的「開心寶寶」，因為薛恩未能分身，將由馬昆代勞，而呢位26歲英籍騎師日前亦協助呂廐「笑傲江湖」贏馬；至於「百賀飛駒」則配韋紀力。另外，東廐「桃花開」則會配麥道朗出戰。