重遇天下第一高手 太陽勇士爭狀元 26/02/2025 跑馬地百萬挑戰盃嚟到今晚上演壓軸戰，現時希斯訓練嘅「太陽勇士」以50分排榜首，睇形勢，呢隻馬今晚出戰第3場三班1650米，即使未能建功，只要跑到亞軍兼且同場嘅「我做到」贏唔到，就篤定成為今季跑馬地王者，為馬主司徒建新拎到100萬獎金。為咗萬無一失，希斯讓上周搏失跑第3名嘅「太陽勇士」匆匆再出，配搭方面亦強配莫雅，盡顯心思。 希斯 點解咁講呢？除咗「太陽勇士」在港首W喺由英國女將杜苑欣客串建功外，呢匹英國嘅自購馬來港前莫雅都曾經騎過兩次，攞到1冠1季，最後一仗喺沙丘圍馬場跑1800米草地賽事就係由莫雅建功，人馬早已有默契，希斯擺明想今次靠故劍重逢嘅威力幫馬兒喺跑馬地百萬挑戰盃壓軸戰順利封王。畢竟「太陽勇士」連續5仗谷草一哩入三甲，作戰狀態處於最佳水平，上仗孭135磅形勢不利下得第3名，今次改跑85分上限三班賽，反而令此駒孭少6磅只負129磅，配合1檔好位，睇嚟希斯有望繼上季嘅「好友心得」後，又多一匹跑馬地百萬挑戰盃狀元啦！ 「太陽勇士」上周三拚得季軍未盡人意。