猴王旺開唔好停 26/02/2025 上個禮拜三谷戰，見到大摩、摩仔喬治同「猴王」系一齊拉頭馬，事關同佢哋關係好好，亦一直靠摩仔入貨嘅「猴王」系馬主張漢傑憑「得道猴王」建功，造就大摩同告東尼呢對襯家齊齊影頭馬相。嚟到今晚跑馬地賽事，張生一口氣派3隻「猴王」出擊，第3場「赤兔猴王」、第8場「花果猴王」都係由告東尼訓練，而第7場嘅「大力猴王」就來自韋廐，相信張生想食住個旺勢，連續兩期贏跑馬地。 「大力猴王」 雖然今期3隻「猴王」近況唔算太好，其中第8場嘅「花果猴王」今季兩戰泥地1200米三甲不入，表現平平，但5歲馬去年11月初發現一對前球節骨受傷，抖到上個月中先復出，熱身兩仗突然轉跑谷草1200米，繼續由手風順嘅巴度兼抽1檔好位，話唔定可以變身。 至於韋達嘅「大力猴王」去年尾打疊贏兩場，即使最近演出回落，但輸完上仗後韋達刻意讓此駒上從化操練，先後試咗3課登山跑道，埋門加兩課草地快跳，工夫非常積極，兼改用艾兆禮出擊，話唔定有變數，值得留意。