競駿當旺　皇者再臨 05/03/2025 如果講目前養馬最多嘅團體，一定係競駿會有限公司，事關佢哋目前有9駒服役，都咪話唔犀利，而啱啱禮拜日佢哋一直寄予厚望嘅「競駿輝煌」，終於攞到今季首場勝仗，攻下二班1400米，競駿會一班成員固然開心，拉頭馬嗰陣時仲見到有成員拎住穿上競駿會綵衣嘅Labubu公仔影相，夠晒特別。 游達榮 到咗今晚跑馬地賽事，競駿會有機會乘勝追擊，事關佢哋有「競駿良駒」、「競駿天下」同埋「競駿皇者」三路興兵，「競駿良駒」屬初出PPG，賽前試閘走勢一般兼配湯普新，邊線機會較高，而「競駿天下」升上四班後表現平平，今次仲要抽12檔，所以爭勝希望應該擺喺「競駿皇者」身上。呢匹出自游達榮馬房嘅愛爾蘭自購馬，去年10月底在港首戰跑三班谷草1200米即贏，可惜翌仗再跑此程三甲不入，今次刻意抖咗3個多月先再上陣，早前仲喺從化試咗兩課大閘，備戰積極，今次抽4檔再次面對蹄下敗將「友愛心得」，有望幫競駿會連贏兩期。 「競駿皇者」季初谷草1200米一出即勝。