試谷閘贏天星 紅衣醒目安仔封神 12/03/2025 啱啱禮拜日希斯訓練嘅「天星」一出即勝，賽後練者仲話呢隻馬有啲似新勝香港經典盃嘅「球星」，自然令人憧憬。不過，既然「天星」贏得咁出色，相信今晚出戰第6場四班1200米嘅初出馬「紅衣醒目」肯定受到關注，事關此駒上個月中試谷閘就係後上衝贏「天星」，走勢譽滿欄邊，今次揀谷草首度登場，莫非想好似同主馬「紅衣醒神」咁由谷草起步最後成為G1冠軍？ 「紅衣醒目」（左）試谷閘壓倒天星勝出。 對於田泰安嚟講，今晚披上「紅衣醒目」呢件紅色加粉紅圓點綵衣上陣，肯定勾起唔少回憶，因為當年同屬顧永祥名下嘅「紅衣醒神」，在港初出一役都係由田泰安執韁贏谷草1000米，其後此駒轉投羅富全馬房後，喺安仔胯下先後攻下香港短途錦標及主席短途獎，所以今次「紅衣醒目」交畀安仔操刀，亦算合情合理。值得一提，原來「紅衣醒目」係馬主顧永祥喺前年嘅澳洲復活節周歲馬拍賣會用咗50萬澳元引入，而最特別係愛駒父線係日本馬王「滿樂時」，後駒英文名Maurice正正就係顧生自己嘅英文名，睇吓今次刻意安排喺谷草出擊，能否順利一鳴驚人啦！ 羅富全