至尊瑰寶翻版馬力 19/03/2025 今個禮拜日上演4歲馬一生一次嘅香港打吡大賽，上季憑「大至尊」揚威呢場大賽嘅馬主陳金雄，今季就冇名下馬參與此項盛事，唯一慶幸就係上年12月初因左後球節受傷要做手術嘅「大至尊」，加盟游達榮馬房後，最近已經可以恢復於從化踱步，證明健康已有起色，當然仲要等多一段時間先有機會出賽。雖然「大至尊」仍在養傷，但今晚角逐第8場三班1200米嘅「至尊瑰寶」亦同陳金雄息息相關，皆因陳生就係後駒馬主勇闖巔峰團體成員，難怪馬名繼續有「至尊」呢兩個字啦，而交畀羅富全訓練亦合理，話晒陳生自己隻「大紅袍」都係擺喺羅廐。 梁家俊 至於今次呢匹「至尊瑰寶」都係英國自購馬，但性質應該同「大至尊」有極大分別，除咗父線出自「摘星勇驥」，喺英國都係跑1000及1200米為主，4戰獲得2冠1殿，最差嗰場就係最後一戰於G3取得第5名，擺明有質素，今次喺從化試咗3課大閘先跑，話晒全哥今季已經有澳洲PP「馬力」插班初出跑三班谷草短途即贏，睇吓「至尊瑰寶」用梁家俊能否照辦煮碗？ 「至尊瑰寶」（近鏡）上周二贏從化草閘。