今日34歲慶生 艾兆禮點亮星火 26/03/2025 踏入來港發展嘅第2季，意大利好手艾兆禮成績更進一步，贏得不少支持，暫時已經有33場頭馬，距離上季嘅48W只爭15場，相信可以突破上季頭馬數字。另外，艾兆禮呢輪手風亦順，計埋剛周日憑「包裝明駒」食尾胡，已經連續4期有進帳，輪到今晚沙田全泥宴，咁啱又係佢34歲牛一，相信佢都好想連贏5日兼贏馬賀壽。 「星火燎原」今季跑泥地短途極之穩定。 睇番賽事形勢，艾兆禮今期9場賽事夫卜上陣，可見大受歡迎，手執不少實力坐騎，如無意外可以自己炮製生日禮物，當中以徐雨石馬房一對「星火燎原」同「論文」餐士最好。 艾兆禮 先講吓「星火燎原」，今季大熟大勇，由五班殺上四班，攞到1冠5亞，最近亦集中喺泥地1200米攻堅，今次重配艾兆禮即使抽10檔，但睇番呢隻馬上仗抽1檔三甲不入，反而對上兩次分別抽11及12檔就得亞軍，話唔定外檔更好，有權補中。 徐雨石 至於「論文」近兩仗改用艾兆禮取得1冠1季，即使悉數喺谷草1650米攞到，但此駒近3次跑泥地一哩都有走勢，今次轉場出擊唔係無根據，難得傷患馬狀態穩定必再拚，亦有權成為佢嘅賀壽馬。