金誠剛加加有求 26/03/2025 早前來港嘅幾位雷霆救兵，奧爾民同麥當能都已經拎到頭馬，前者更成功延長牌照至季尾，得番金誠剛一個斯人獨憔悴，仲未開齋。其實金誠剛嘅牌照去到下個月2日就完，換言之計埋今晚只係得3次賽事畀佢力爭在港首W，相信佢都唔想今次客串期交白卷。而喺今晚沙田全泥宴，雖然金誠剛只得3匹坐騎，但一向支持新騎師嘅姚本輝將「超加加」及初出馬「扶搖勢勁」交畀佢執韁，話唔定可以幫佢打開缺口。 「超加加」（近鏡）上仗泥地短途後上第2。 先講吓第3場四班1650米嘅「超加加」，首次上陣已經喺泥地跑第3名，證明性能唔錯，上仗改用金誠剛執韁，早段卻留到包尾，直路已經畀頭馬「贏得自然」走甩，但都可以追上嚟入Q，走勢吸引，既然一連幾次喺泥地1200米都追唔切，今次姚本輝索性讓「超加加」增程跑一哩，亦屬合理部署，有權收復前失。至於第7場嘅初出馬「扶搖勢勁」，近期一直喺從化操練，埋門試泥地1200米大閘率先衝線，走勢吸引，亦係嗰日咁多組泥地1200米大閘中時間最快嗰組，今次初出跑泥地唔係玩玩吓，睇吓金誠剛能否把握機會？ 金誠剛