南區之星旺人加持 30/03/2025 有時啲嘢只要打開到缺口，頭馬就會不斷嚟。好似陳文俊、方文傑、黃靈新同黃焯添幾位老友夾份養嘅「南區旺」，搏咗3季一直都贏唔到，最叻攞到3次亞軍，但啱啱禮拜三沙田全泥宴，改用艾兆禮再跑五班1200米泥地，結果打開勝門，陳生嗰晚仲專程帶埋媽媽入場，結果可以一齊影張頭馬相，梗係開心啦！ 艾兆禮 到咗今日又係跑沙田，陳生、方生同埋黃生又有機會再拉頭馬，事關輪到佢哋有份嘅南區之友團體名下嘅「南區之星」上陣，後駒同樣出自羅富全馬房，初出已經喺四班1400米有走勢，上月底再跑同程只係輸「首飾天空」頸位飲恨得亞軍，今次同樣改配艾兆禮出擊，話唔定好似「南區旺」咁順利補中呢？ 雖然只得3歲，「南區之星」來港後適應算快，剛戰幾乎打開勝門，表現出色，今次再跑1400米，早前一早搵定艾兆禮幫手過檔拍跳，擺明立心換人，既然連咁難贏嘅「南區旺」都開齋，睇吓能否帶挈埋「南區之星」都收復前失啦？