黃婉曼凝聚觀眾之力 06/04/2025 上個禮拜日前新聞主播周嘉儀名下嘅「天下寵兒」力拚飲恨，連續3仗跑第2名，仲未打開勝門，的確可惜。相隔一個禮拜，周嘉儀嘅師姐，另一位新聞之花黃婉曼首匹愛駒「觀眾之力」首度登場，角逐第6場三班1200米，相信Icy應該有心安排愛駒今日出擊，事關今日舉行香港中文大學校友會聯會盃，而佢正正係中大新聞系畢業，如果順利贏馬，應該更有意義啦。 黃婉曼 雖然比周嘉儀更遲擁有首匹個人名下賽駒，但其實黃婉曼做馬主嘅經驗更加豐富，事關佢曾經係跳出香港團體成員，愛駒「跳出香港」服役期間累積6冠2亞2季，最叻仲試過喺G2沙田錦標殺低「夏威夷」及「美麗傳承」。另外，Icy老公馮柏基亦係馬主，依家養咗匹「飛雲」擺喺柏廐，之前「飛雲」出賽，Icy有時都會帶埋好友「少婦聯盟」嘅陳凱琳、龔嘉欣及譚凱琪入場打氣，今次輪到自己嘅「觀眾之力」初次上陣，應該唔例外啩？至於呢匹「觀眾之力」來港初期試過左前腿肱骨受傷，被迫休息一輪，但最近操練正常，埋門試大閘漸漸上力，話晒來港前一戰即勝未見底，值得留意。 觀眾之力埋門試泥閘第3名走勢爽。