丁仔人和家盛食住上 09/04/2025 經過上季只得12W要收警告信後，丁冠豪梗係唔想連續兩季唔合格，所以今季一直好努力以有限兵源打護級戰，計埋啱啱禮拜日憑「永勝金駒」食頭胡，丁廐暫時已經有11場頭馬喺手，仲差3W就達標，距離馬季結束仍有3個幾月，上岸機會尚算樂觀，畢竟目前丁廐都有40駒，不乏質新分子。 「人和家盛」上仗回師谷草1200米取勝。 今晚跑馬地賽事，丁冠豪有權乘勝追擊，兩匹參戰馬「人和家盛」及「寶成智星」都係挾新勝之勢而來，絕對有權為馬房帶來進帳。已屆9歲嘅「人和家盛」，今季開鑼日以57倍冷門贏四班1400米時，仲係由沈集成訓練，但季中就轉投丁廐，跑咗兩場1400米表現平平，剛戰轉場縮程跑起家路程谷草1200米，結果後上擊敗「酷霸王」及「幸運星球」建功，後駒最近已補中，反映賽事水準不差，亦證明丁師傅保養得宜，令9歲老馬「人和家盛」保持戰鬥力。此外，「人和家盛」馬主張明敏等人早前喺香港國際馬匹拍賣會以140萬購入新血「人和家喜」，都係擺喺丁廐，為報答馬主支持，相信「人和家盛」肯定毫無保留，今回再用鍾易禮跑谷草1200米，不能忽視。