周俊樂當旺稱皇 13/04/2025 經過早輪一段低潮期後，本地薑周俊樂最近手風終於轉順，一口氣連贏2日，對Jerry有極大幫助。不過，由於早前喺陣上犯規，由今個月20日嘅復活節賽馬日起，佢又要停賽4期，相信佢都想趁自己呢輪旺啲，盡量喺停賽前爭取更多頭馬，而喺今日佢騎8駒上陣，角逐第6場四班1400米嘅「小皇爺」，有望幫佢連贏3日。 小皇爺 喺見習生時期於韋達門下嘅周俊樂，自從升格做大師傅後，與韋達嘅合作一度銳減，但佢呢段時間卻得到容天鵬嘅支持，先至令佢維持一定成績。不過，今季周俊樂除咗開齋頭馬「時尚風趣」來自容廐，只曾於12月尾為鵬哥嘅「不同世界」再添進帳，騎練兩人只合作贏2W，唔算理想。至於由鵬哥訓練嘅「小皇爺」，至今4仗都係由周俊樂執韁，上仗跑1400米不敵初出嘅超級馬「綠野飛馳」得亞軍，今回強手已去，睇吓周俊樂同鵬哥相隔3個幾月能否再次合作贏馬？