停賽前順便慶生 周俊樂25歲做君子 16/04/2025 周俊樂經過1月中去到4月初嘅低潮期，最近成個人醒番晒，自上個禮拜日憑「永勝金駒」打開缺口後，連續3期有馬贏，啱啱禮拜日仲爆出驚人冷門「實現夢想」，認真犀利。不過，跑完今晚跑馬地賽事，周同學就要停賽4期，相信佢都想停賽前盡情數胡，咁啱今日就係佢25歲牛一，梗係想為自己炮製賀壽馬兼連贏4期啦！而喺5匹坐騎中，絕對有機會憑葉楚航嘅「謙謙君子」先拔頭籌。 「謙謙君子」谷草1000米兩捷屬強項。 6歲愛爾蘭自購馬「謙謙君子」自從上季尾加盟葉廐後，演出都算穩定，先後拎到1冠2亞2殿，贏馬一役正正係上季由周俊樂執韁跑五班谷草1000米，而此駒最近就一直由蔡明紹策騎，雖然都攞到獎金，但同頭馬無緣，因此今次重配周俊樂都非常合理，埋門最後快跳亦由佢親自主理，備戰認真，最重要係oin 今次孭少5磅，有權成為周俊樂嘅賀壽馬。 周俊樂 納百川力爭尾胡 另外，尾場「納百川」一向係周俊樂嘅嫡系坐騎，佢同馬主之一嘅鍾一帆關係好好，今次夥拍此駒重返谷草一哩，有力食尾胡。 葉楚航